Frá fikti til fíknar: Hvað fær einstaklinga til að fara frá fikti til fíknar

Í þessari ritgerð verður fjallað um vímuefnaröskun og hvernig einstaklingur byrjar að nota vímuefni sem leitt getur til vímuefnaröskunar og fíknar. Einnig verða meðferðarstofnanir hérlendis skoðaðar. Markmið ritgerðarinnar er að varpa ljósi á hvernig ferlið frá fikti á vímuefnum til þess að verða háður þeim virkar og hvernig meðferðarstofnanir hérlendis aðstoða þá einstaklinga sem glíma við vímuefnaröskun. Fræðileg umfjöllun ritgerðarinnar beinist að skilgreiningum á vímuefnum og þá slævandi, örvandi og skynvillandi, vímuefnaröskun og fíkn. Þær kenningar sem skoðaðar verða eru tengslamyndun og tengslaröskun, áfallakenningin og stimplunarkenningin. Sjúkdómslíknaið verður skoðað og hvernig áföll hafa áhrif á vímuefna notkun einstaklinga. Rannsóknarspurningarnar sem leitast er eftir að svara eru: Hvað fær einstaklinga til að fara frá fikti til fíknar? og Hvernig er meðferðarúrræðum háttað á Íslandi? Niðurstöður rannsóknarinnar eru þær að engin ein skýring er á því hvað veldur því að einstaklingur fari frá fikti til vímuefnaröskunar. Til þess að einstaklingur nái bata á vímuefnaröskun sinni þarf að komast að því hvaða ástand viðkomandi vill vera í, því er mikilvægt að skoða hvert mál fyrir sig og aðstoða viðkomandi út frá hans máli. Meðferðarúrræði þurfa því að vera einstaklingsmiðuð því engir tveir einstaklingar vinna úr áföllum á sama hátt