Samfélagsleg ábyrgð fyrirtækja: Fræðilegar áherslur og dæmi úr íslensku atvinnulífi

Meðvitund fólks um samfélags- og umhverfislega ábyrgð er alltaf að verða meiri í samfélögum nútímans. Samhliða því er meðvitund og kröfur neytenda á fyrirtæki um að þau sýni ábyrgð og reyni markvisst að takmarka þann skaða sem starfsemi þeirra kann að hafa á umhverfið og samfélagið sífellt að aukast. Ritgerð þessi fjallar um samfélagslega ábyrgð fyrirtækja (e. corporate social responsibility). Til þess að fá innsýn í nálgun fyrirtækja sem starfa hér á landi varðandi samfélagslega ábyrgð í íslensku atvinnulífi ákvað höfundur að leita til tveggja fyrirtækja sem eru áberandi á íslenskum markaði, Krónunnar og Coca-Cola European Partners. Markmið þessarar ritgerðar var að skoða fræðin á bak við samfélagslega ábyrgð, komast að mikilvægi samfélagslegrar ábyrgðar fyrir fyrirtæki, hverjar mismunandi birtingarmyndir hennar eru, hvernig hún birtist í íslenskum fyrirtækjum og hvort að henni fylgi ávinningur fyrir fyrirtæki. Helstu niðurstöður ritgerðarinnar eru að mikilvægi samfélagslegrar ábyrgðar er gífurlega mikið fyrir fyrirtæki og getur skipt sköpum ef fyrirtækjum ætlar að vegna vel og ná eða viðhalda samkeppnisforskoti. Ritgerðin leiddi ennfremur í ljós að samfélagsleg ábyrgð er ekki síður mikilvæg fyrir samfélagið, framtíð komandi kynslóða og þá plánetu sem við búum á. Samfélagsleg ábyrgð tekur á sig ýmsar mismunandi birtingarmyndir og er í mörg horn að líta fyrir fyrirtæki sem ætla að taka því alvarlega að vera samfélagslega ábyrg. Til þess að setja sér markmið, brjóta þau niður í verkefni og fylgjast með árangri á sviði samfélagslegrar ábyrgðar er nytsamlegt að taka saman samfélagsskýrslu þar sem farið er yfir árangur, verkefnin útskýrð og úrbútaverkefni útlistuð. Samfélagsleg ábyrgð getur skilað fyrirtækjum margþættum ávinningi á borð við að skapa jákvæða tengingu við vörumerki, bæta viðskiptatengsl og skapa sjálfbært samkeppnisforskoti svo dæmi séu tekin