Félagsráðgjöf á réttargeðdeild: Hlutverk félagsráðgjafa í starfi með geðfötluðum afbrotamönnum.

Réttargeðdeild Landspítalans á Kleppi er lokuð geðdeild og þar dvelja sjúklingar á grundvelli dóms. Deildin tilheyrir geðsviði Landspítalans sem hefur það að markmiði að auka lífsgæði og efla heilbrigði fólks. Á deildinni starfa hinar ýmsu fagstéttir við meðferðir og endurhæfingu með það að markmiði að einstaklingar geti snúið aftur út í samfélagið. Starfssvið félagsráðgjafa er fjölbreytt, þeir starfa við hagsmuna- og réttindagæslu skjólstæðinga, tengja saman félagsleg kerfi og úrræði, sinna klínískri vinnu og starfa með hinum ýmsu fagstéttum í þverfaglegum teymum. Í þessari ritgerð var leitast svara við spurningunni: Hver eru hlutverk félagsráðgjafa í starfi með geðfötluðum afbrotamönnum sem vistaðir eru á réttargeðdeild? Til að svara þeirri spurningu var stuðst við rannsóknir, skýrslur, lög og aðrar heimildir. Niðurstöður ritgerðarinnar sýndu að hlutverk félagsráðgjafa á réttargeðdeild eru mörg, þeir sinna meðferðum sjúklinga, fjölskyldum þeirra og hópmeðferðum. Félagsráðgjafar reyna að stuðla að virkni á meðan innlögn stendur, tengja sjúklinga við virkniúrræði, þjónustu og geta aðstoðað við að greiða úr fjárhagsvanda. Stór þáttur í starfi félagsráðgjafa er einnig að undirbúa útskrift sjúklinga og koma að gerð endurhæfingaáætlana áður en sjúklingur er útskrifaður. Samkvæmt niðurstöðum er skortur á þjónustu- og eftirfylgdarúrræðum fyrir geðfatlaða einstaklinga við útskrift af réttargeðdeild. Áhugavert væri að sjá íslenska útgáfu af réttargöngudeild fyrir geðfatlaða einstaklinga sem hafa framið afbrot líkt og eru í Þýskalandi. Þar hafa réttargöngudeildir verið starfræktar í þó nokkur ár með góðum árangri og tryggja sjúklingum áframhaldandi stuðning, eftirfylgd og aðstoð við að fóta sig í samfélaginu að útskrift lokinni