Lúxusvörumerki og efnishyggja. Tengsl efnishyggju og viðhorfs til lúxusvörumerkja

Áhugi á lúxusvörumerkjum hefur aukist til muna síðustu ár og markaðurinn fyrir slík vörumerki fer ört vaxandi. Ýmsir hvatar hafa áhrif á neyslu einstaklinga á lúxusvörumerkjum en þeir geta verið bæði félagslegs eðlis og persónubundnir. Efnishyggja, þekking og hinir ýmsu tilfinninga- og hegðunartengdir þættir eiga þátt í að móta viðhorf einstaklinga til lúxusvörumerkja. Efnishyggið fólk sækist eftir því að eiga veraldlegar eigur og lítur á þær sem leið að hamingju og tákn um velgengni. Það á til að sjá lúxusvörumerki sem leið til að tjá félagslega stöðu sína og velgengni. Markmið þessarar rannsóknar var að kanna hvort efnishyggja geti skýrt viðhorf til lúxusvörumerkja út frá rannsóknarspurningunni „eru tengsl á milli viðhorfs einstaklinga til lúxusvörumerkja og hversu hátt þeir mælast á efnishyggju?". Í þessari rannsókn var gerð megindleg könnun sem deilt var á samfélagsmiðlum og alls tóku 265 manns þátt í henni. Niðurstöður rannsóknarinnar leiddu í ljós að jákvæð tengsl eru á milli þess hversu hátt einstaklingar mælast á efnishyggju og viðhorfi þeirra til lúxusvörumerkja. Efnishyggja getur skýrt viðhorf til lúxusvörumerkja og þeir þátttakendur sem mældust hærra á efnishyggju höfðu jákvæðari viðhorf til þeirra. Einnig kom í ljós að neikvæð tengsl eru á milli aldurs og efnishyggju og því er yngra fólk líklegra til þess að mælast hærra á efnishyggju en eldra fólk. Niðurstöður rannsóknarinnar veita upplýsingar sem gætu komið að góðum notum fyrir þá sem starfa á lúxusvörumarkaðinum og fyrir þá sem hyggjast koma inn á þann markað í framtíðinni