Heilbrigði og ábyrgð. Hættur og möguleikar þess að bera ábyrgð á eigin heilbrigði

Í þessari ritgerð er hugtakið heilbrigði skoðað út frá ábyrgð einstaklingsins á eigin heilbrigði ásamt mögulegri áhættu sem henni fylgir. Farið verður yfir víðan völl í þessari umfjöllun þar sem fyrst er skoðuð skilgreining Alþjóðaheilbrigðismálastofnunar, WHO, á heilbrigði, rýnt er í tengsl sjúkdómavæðingar og ábyrgðar og hvernig ábyrgð okkar gagnvart samfélaginu getur stangast á við ábyrgð okkar á eigin heilbrigði. Í öðrum kafla verða hugmyndir Friedrich Nietzsches um heilbrigði kynntar til leiks. Þar verður einblínt á áhætturnar sem felast í því sem ég kalla „hið uppreisnargjarna heilbrigði“ ásamt því að skoða heilbrigðið út frá einstaklingnum sjálfum. Í þriðja kafla mun ég fjalla um hugmyndir Carl G. Jungs og Joseph Campbells um hetjusöguna, þroskaferli hetjunnar og tengsl hetjusögunnar við heilbrigði. Þar geri ég tilraun til að samrýma söguna um hetjuferðina við vegferð okkar milli veikinda og heilbrigðis. Vegferð hetjunnar er áhættusöm og krefst ábyrgðar hetjunnar sjálfrar og mun ég skoða þessa þætti út frá heilbrigðinu. Í lokin mun ég síðan velta fyrir mér takmörkum hetjusögunnar og athuga hvernig heilbrigðið gæti tengst frumvitund okkar og þá þeirri leiðsögn sem stjórnast af eðlisávísun og innsæi. Þá tengingu mun ég einnig skoða með hliðsjón af ábyrgð einstaklingsins á eigin heilbrigði og þeirri áhættu sem hún felur í sér. Lykilorð: Heilbrigði Ábyrgð Nietzsche Jun