Fyrirtækjamenning ÁTVR. Hvers konar menning?

Verkefnið er lokað í 5 ár með samþykki Viðskiptafræðideildar.Í verkefni þessu var skoðuð fyrirtækjamenning Áfengis- og tóbaksverslunar ríkisins (ÁTVR). Á árinu 2001 setti ÁTVR á laggirnar nýja vörumerkið Vínbúðin sem fyrirtækið hefur notað síðan þá. Vínbúðirnar hafa á undanförnum árum verið áberandi hvað varðar að veita viðskiptavinum sínum góða þjónustu, líkt og niðurstöður kannana og rannsókna sýna fram á. Margir í samfélaginu hafa undrast það að ríkisfyrirtæki, sem er einkasali áfengis í landinu, geti náð það langt að vera í fremsta flokki hvað varðar ánægju viðskiptavina og ánægju starfsfólks. Fyrirkomulag áfengissölu í landinu hefur mikið verið til umræðu á undanförnum árum og hafa verið lögð fram fjölmörg frumvörp þess efnis að breyta fyrirkomulaginu. Þrátt fyrir að sótt hafi verið hart að fyrirtækinu í þeim efnum hefur það ekki komið niður á gæðum þjónustunnar sem fyrirtækið veitir. Spurningalisti Denison var lagður fyrir allt starfsfólk ÁTVR og niðurstöður þeirra mælinga notuð í verkefnið, fyrirtækjamenning ÁTVR skoðuð og síðan borin saman við önnur fyrirtæki og stofnanir. Áhugavert var að skoða ÁTVR í samanburði við önnur fyrirtæki og stofnanir, en segja má að ríkisfyrirtæki almennt hafi ekki staðið sig vel hvað varðar góða fyrirtækjamenningu. Því var skemmtilegt að skoða niðurstöður fyrirtækjamenningar ÁTVR samanbornar við fyrirtækjamenningu annarra fyrirtækja. Niðurstaðan gefur til kynna að þó svo að fyrirtæki, sérstaklega þau sem eru ríkisfyrirtæki og að starfsemi þeirra sé innan þröngs lagaramma geti þau náð miklum árangri með því að setja sér markmið og mæla árangur. Það virðist því vera í höndum stjórnenda þessara fyrirtækja og stofnana að búa til jarðveg innan þeirra þar sem hægt er að sá í góðum fræjum eins og gildum, skýrri heildarstefnu, markmiðum, góðri þjónustu og liðsheild, eflingu menntunar starfsfólks og svo framvegis. Slíkur jarðvegur mun skila fyrirtækinu bættri uppskeru og betri fyrirtækjamenning mun líta dagsins ljós