Eitt er víst að hlutirnir verða aldrei eins: Hverju leitar ungt fólk nú á dögum eftir í störfum, samskiptum og stjórnendastíl?

Á síðustu áratugum hafa breytingar orðið á vinnuafli sem leitt hafa til áskorana í fyrirtækjum. Unga kynslóðin sem er að feta sín fyrstu fótspor á vinnumarkaðinum nú á dögum er afar ólík þeirri kynslóð sem lengst hefur verið. Viðhorf þeirra og væntingar til vinnu eru ekki þær sömu. Algengt er að eldri einstaklingar á vinnumarkaði séu tryggir og trúir vinnuveitanda sínum og líti á starf sitt sem ævistarf á meðan þeir ungu leggja áherslu á að vinnan sé skemmtileg og ef þeim líkar ekki við starfið þá yfirgefa þeir vinnustaðinn. Fyrirtæki og stjórnendur þurfa að koma til móts við unga starfsmenn til þess að halda þeim í vinnu til lengri tíma. Markmið með þessari rannsókn var að kanna hvaða þættir það eru annars vegar í störfum og hins vegar í samskipta- og stjórnunarstíl sem höfða til unga fólksins á vinnumarkaðinum um þessar mundir. Fræðilegur bakgrunnur er aðallega sóttur til erlendra rannsókna og greina sem tengjast ungu fólki á vinnumarkaðinum, en lítið hefur verið skrifað um viðhorf ungs fólks nú á dögum þegar litið er til stjórnenda og vinnumarkaðarins hér á landi. Eigindleg rannsóknaraðferð var notuð og tekin voru níu viðtöl við unga starfsmenn sem höfðu allir reynslu af vinnumarkaðinum og gátu myndað sér skýra skoðun um þessi mál. Helstu niðurstöður rannsóknarinnar gefa til kynna að ungu starfsfólki líður almennt vel í sveigjanlegu umhverfi, þar sem verkefnin sem fylgja starfinu þjóna skýrum tilgangi. Einnig leiddu niðurstöður í ljós að möguleikar á starfsþróun geti leitt til þess að ungi starfsmaðurinn haldist lengur í starfi. Ungir starfsmenn vilja að stjórnandinn komi fram við þá sem jafningja, leiðbeini þeim og gefi þeim færi á að taka þátt og nýta styrkleika sína