Straumlínustjórnun í smásölufyrirtæki: Leið að betra upplýsingaflæði og bættri þjónustu?

Örar breytingar í viðskiptaumhverfi þjónustufyrirtækja kalla á skilvirkari leiðir til þess að uppfylla þarfir viðskiptavina. Vinsældir straumlínustjórnunar í þessu samhengi hafa farið vaxandi og hafa þjónustufyrirtæki í auknum mæli aðlagað hugmyndafræðina að starfsemi sinni með miklum ávinningi. Straumlínustjórnun er hugmyndafræði sem miðar að því að auka skilvirkni og flæði vöru og þjónustu ásamt því að lágmarka sóun. Lítið hefur þó verið skrifað um notkun straumlínustjórnunar í smásölu. Þessi rannsókn var unnin í samstarfi við íslenskt smásölufyrirtæki. Markmið rannsóknarinnar var að greina núverandi ferla í upplýsingaflæði fyrirtækisins ásamt því að greina hvernig hægt sé að beita aðferðum straumlínustjórnunar til þess að auka skilvirkni í flæði upplýsinga, og þar með að auka gæði þjónustunnar. Vegna eðli rannsóknarinnar var ákveðið að styðjast við hagnýta rannsóknaraðferð þar sem að aðferðin miðar að því að greina vandamál ásamt því að finna hugsanlegar lausnir á þeim. Gögnum var safnað með fimm eigindlegum viðtölum og fimm vettvangsathugunum sem framkvæmdar voru bæði innan verslunar og utan. Megin niðurstöður rannsóknarinnar leiddu í ljós að mikilvægt er fyrir smásölufyrirtækið að leggja áherslu á að efla mannauðinn með því að veita honum skýrari og markvissar upplýsingar. Hjá þjónustufyrirtækjum eru framlínustarfsmenn gjarnan birtingarmynd þeirrar þjónustu sem að fyrirtækið veitir. Því er mikilvægt að byggja sterkan grunn með því að veita starfsfólki viðeigandi upplýsingar um starfið þeirra. Þetta á við um að hafa skýrar starfslýsingar, vel skilgreinda ferla, skýra hlutverkaskiptingu, ásamt því að veita markvissa starfsþjálfun. Með því að beita aðferðum straumlínustjórnunar í þessu samhengi er verið að gera verkefni sýnileg, auka samskipti á milli starfsmanna og stjórnenda og þar með stuðla að auknu flæði upplýsinga. Jafnframt er verið að stuðla að því að starfsmenn styðjist við sömu vinnubrögð ásamt því að skapa menningu sem byggir á stöðugum umbótum. Allt þetta ýtir undir aukið virði fyrir viðskiptavininn í formi bættrar þjónustu.Verkefnið er lokað í 3 ár með samþykki Viðskiptafræðideildar