Sjónarmið nemenda á þjónustu háskólanna í heimsfaraldri: Hvað er hægt að læra af óvissu tímum?

Í febrúar 2020 var fyrsta tilfelli Covid19 greint hér á landi, stuttu síðar var sett á samkomubann til að hefta útbreiðslu sjúkdómsins. Við það þurftu háskólarnir að loka byggingum sínum og breyta öllu námi yfir í fjarnám. Þar sem lítið var vitað um hversu lengi samkomubannið myndi standa var námsmati og lokaprófum vormisseris fljótlega breytt. Ákveðið var í lok vorannar að haustönnin yrði fyrst um sinn í fjarnámi með þeim möguleika að staðnám gæti átt sér stað ef aðstæður leyfðu. Markmið verkefnisins var að kanna viðhorf nemenda á þjónustunni sem háskólarnir veittu á meðan samkomubannið stóð yfir. Til þess var notast við rýnihóp, þar sem átta nemendur komu saman og áttu umræður á fjarskiptaforritinu Teams. Leitast var eftir að skoða hvað þátttakendum fannst háskólarnir hafa gert vel og illa, einnig hvað mætti læra af þeim ákvörðunum sem teknar voru. Helstu niðurstöður sýndu að nemendur voru heilt yfir sáttir með þær ákvarðanir sem teknar voru á vorönn. Þeir voru ánægðir með þann sveigjanleika sem þeir fengu varðandi námsmatið og hversu fljótt ákvarðanir voru teknar. En þeim fannst að ákvarðanirnar á haustönninni hefðu mátt vera aðrar. Þeir voru ósáttir með að ákvarðanir voru teknar seint og þær ákvarðanir voru ekki í samræmi við þá stöðu sem var í samfélaginu. Því er margt sem stjórnendur og kennarar háskólanna geta lært af þessum ákvörðunum til dæmis það að taka ákvarðanir í samráði við nemendur. Einnig hefðu úrræðin mátt vera í takt við það að vitað var að nemendur væru orðnir þreyttir á stöðunni sem ríkti í samfélaginu