Áhrif útihlaupa á almenna kvíðaröskun og felmtursröskun. Lausnir félagsráðgjafar og útihlaup sem úrræði

Hreyfing er mikilvæg fyrir andlega og líkamlega heilsu á meðan kyrrseta er mikil ógn við lýðheilsu í heiminum. Einnig hefur hreyfing verið talin fyrirbyggjandi þáttur í baráttu gegn lífsstílssjúkdómum og andlegum kvillum. Almenningshlaup er hreyfing sem er einföld í framkvæmd og ódýr að auki. Almennt getur hver sem er tekið upp hlaup svo lengi sem fylgt er eigin hraða og sannfæringu um ágæti þess að hreyfa sig og aðrir líkamlegir kvillar standa ekki í vegi. Viðfangsefni þessarar heimildaritgerðar er að skoða áhrif hreyfingar, þá fyrst og fremst útihlaupa, á felmtursröskun og almenna kvíðaröskun. Settar voru fram tvær megin rannsóknarspurningarnar: Hver eru áhrif útihlaupa á almenna kvíðaröskun og felmtursöskun? Er hægt að nota útihlaup sem úrræði fyrir fólk sem þjáist af þessum kvíðaröskunum? Til að fá svör við þessum spurningum voru innlendar og erlendar greinar á þessu sviði greindar. Niðurstöður ritgerðinnar sýna fram á jákvæð áhrif útihlaupa og hreyfingar fyrir heilsu. Útihlaup hefur verið notað í einhverjum mæli sem úrræði við kvíðaröskunum. útihlaup og hreyfing er ódýr kostur samanborið við lyfjameðferð og viðtalsmeðferð. Hægt er sameina útihlaup með hugrænni atferlismeðferð. Útihlaup geta einnig verið fyrirbyggjandi aðgerð gegn einkennum felmtursröskunar og almennrar kvíðaröskunar. Með útihlaupum er hægt að þjálfa líkamann í að takast á við kvíðaköst en einnig að kenna líkamanum að engin hætta staðar af þegar einkenni gera vart um sig. Með sjónarmið styrkleikanálgunar og valdeflingu í forgrunni geta félagsráðgjafar nýtt hreyfingu og útihlaup sem úrræði fyrir skjólstæðinga en þó ekki meðferð eitt og sér. Útihlaup koma ekki í stað viðurkenndra meðferða fyrir einstaklinga með felmtursröskun og almenna kvíðaröskun þó að jákvæðu áhrifin séu óumdeild