Framtíð bensínstöðva á Íslandi

Viðfangsefni þessarar rannsóknar er framtíð bensínstöðva á Íslandi. Miklar breytingar eru í vændum á þjónustu og hlutverki bensínstöðva landsins þar sem orkuskiptin eru í fullum gangi ásamt því að skipulagsbreytingar stuðla að fækkun bensínstöðva á höfuðborgarsvæðinu. Einnig verður varpað ljósi á það hvernig önnur lönd eru að bregðast við þessari þróun og áætlanir þeirra bornar saman við framgang mála á Íslandi. Framkvæmd var eigindleg rannsókn í formi viðtala til að safna gögnum um viðfangsefnið. Þau félög sem tekin voru fyrir í rannsókn þessari voru N1 hf., Olíuverzlun Íslands hf. (Olís), og Skeljungur hf. Tekin voru viðtöl við fulltrúa þessara fyrirtækja sem allir hafa mikla þekkingu á málefnum bensínstöðva. Einnig var tekið viðtal við fulltrúa BL ehf. til að fá betri innsýn í hvernig bílaumboðin hér á landi ætla að bregðast við rafbílavæðingunni. Ómögulegt er að segja nákvæmlega til um framtíð bensínstöðva en ýmislegt bendir til þess að hlutverk þeirra muni breytast verulega á komandi árum. Allt bendir til þess að rafknúnum bifreiðum muni fjölga ört á næstu árum og á endanum muni umhverfisvænir orkugjafar ráða ríkjum hér á landi. Þjónustustöðvum bensínstöðva mun fækka en olíufélögin eru að leita lausna til að halda áfram að þjónusta viðskiptavini sína