Markaður íslenskra tilboðssíðna

Með tilkomu internetsins og vegna mikilla framfara í öllu sem við kemur stafrænni tækni áttu sér stað veigamiklar breytingar í verslun sem fólust í því að hún fór smátt og smátt að færast á netið. Netverslanir fóru að skjóta upp kollinum víða og höfðu þessar breytingar ekki aðeins áhrif á form verslunar heldur breytti þetta einnig markaðssetningu þeirra gríðarlega. Ein tegund netverslana eru svokallaðar tilboðssíður og kom fyrsta íslenska tilboðssíðan á markað árið 2001. Eins og staðan er í dag eru starfræktar nokkrar slíkar síður sem eru allar með mismunandi áherslur. Þrátt fyrir að íslenski markaðurinn sé lítill þá hefur notkun internetsins aukist gríðarlega og sífellt fleiri nýta sér þann kost að kaupa vörur á netinu. Markmið þessarar ritgerðar er að skoða markað tilboðssíðna og sjá hvort markaður væri fyrir aðra tilboðssíðu. Í fyrsta hluta er skrifað um markaðinn eins og hann er í dag og um framtíðarhorfur hans. Þá er farið í þá fræðilegu þætti sem huga þarf að í tengslum við stofnun og rekstur á tilboðssíðu. Rannsókn var framkvæmd þar sem spurningalisti var lagður fyrir á internetinu og unnið var úr þeim gögnum. Í síðasta hluta ritgerðarinnar eru dregnar saman niðurstöður úr rannsókninni og sett fram svar við rannsóknarspurningu. Helstu niðurstöður rannsóknarinnar eru að 59% þátttakenda hafa verslað einu sinni eða oftar á tilboðssíðum síðastliðið ár og flestir uppgötva vörurnar í gegnum samfélagsmiðla. Verð og gæði virðast vera þeir eiginleikar sem skipta mestu máli þegar verslað á tilboðssíðum. Reynslan af slíkum síðum er almennt góð og um það bil helmingur þátttakenda telur sig líklegan til þess að nýta sér tilboðssíður í framtíðinni. Það virðist ekki vera nein sérstök ástæða fyrir því hvers vegna fólk verslar ekki á tilboðssíðum. Afþreying og upplifun eru þær vörur sem fólk er spenntast fyrir