Tækifæri og áskoranir í kennslu tvítyngdra nemenda á yngsta stigi grunnskóla

Þessi ritgerð er lögð fram til B.Ed. prófs í grunnskólakennarafræði við Menntavísindasvið Háskóla Íslands. Hér verður fjallað um fræðilegar skilgreiningar á tvítyngi, tvítyngda nemendur og áskoranir sem þeir glíma við á fyrstu árum máltöku í nýju landi en einnig hvernig er hægt að koma til móts við tvítyngda nemendur á yngsta stigi grunnskólans. Sjónum er beint að málþroska barna og hversu mikilvægt er að kennsla sé markviss strax frá upphafi og að nemendur fái þá kennslu sem þeir eiga rétt á. Í allnokkurn tíma hefur verið ljóst að þörf fyrir markvissa kennslu tvítyngdra nemenda, námsefni við hæfi og meiri fræðslu fyrir kennara þarf að sinna enn betur en hefur verið gert hingað til. Markmiðið með þessari ritgerð er að varpa ljósi á þann veruleika sem tvítyngd börn upplifa í íslensku skólakerfi og benda á mögulegar úrbætur fyrir þennan sístækkandi nemendahóp í íslenskum grunnskólum