Viðhorf neytenda til ákjósanlegra eiginleika í fari íslenskra áhrifavalda

Stafræn markaðssetning hefur tekið gífurlegum breytingum seinustu ár. Samfélagsmiðlar eru orðnir stór vettvangur fyrirtækja til að koma sér á framfæri og eru mörg þeirra byrjuð að nota áhrifavaldamarkaðssetningu til að auka vörumerkjaímynd og breyta kauphegðun neytenda. Áhrifavaldar geta haft áhrif á hegðun og skoðanir einstaklinga sem þeim fylgja. Tilgangur rannsóknarinnar var að auðvelda fyrirtækjum á íslenskum markaði val á áhrifavöldum þegar kemur að því að markaðssetja vöru og þjónustu á samfélagsmiðlum með því að svara spurningunni hvaða eiginleika íslenskir neytendur telja vera mikilvægasta í fari áhrifavalds. Við gerð ritgerðarinnar voru framkvæmdar tvær rannsóknir með kauphegðunarferli neytenda til hliðsjónar. Í fyrri rannsókninni voru tekin tíu djúpviðtöl með eigindlegri aðferð. Viðtölin voru tekin í þeim tilgangi að fá innsýn í það hvaða eiginleikar áhrifavalda eru neytendum mikilvægastir. Niðurstöður viðtalanna sýndu að neytendur leggja mesta áherslu á eiginleikana þekkingu, virkni og traust. Seinni rannsóknin var könnun framkvæmd út frá niðurstöðum viðtalanna. Könnunin innihélt almennar spurningar og samhliða greiningu sem er tilvalin til þess að kanna raunverulegt mikilvægi eiginleika áhrifavalds. Niðurstöður seinni rannsóknarinnar voru að lífstíll skiptir fylgjendur raunverulega mestu máli og þar á eftir virkni. Niðurstöður rannsóknarinnar gefa til kynna að til þess að áhrifavaldar haldi fylgjendum sínum þurfi þeir að vera traustir, hafa reglulega virkni og búa yfir þekkingu á því sem verið er að auglýsa eða miðla. Mikilvægast fyrir þátttakendum rannsóknarinnar er þó lífsstíllinn sem áhrifavaldurinn sýnir á samfélagsmiðlum. Þessar niðurstöður eru nytsamlegar fyrir fyrirtæki sem ætla sér að nota markaðssetningu með áhrifavöldum