Stuðningur við nemendur af erlendum uppruna í grunnskólum : hlutverk og ábyrgð þroskaþjálfa

Viðfangsefni ritgerðarinnar beinir sjónum að störfum þroskaþjálfa sem starfa með fjölbreyttum hópi barna í grunnskólum, þá einkum börnum af erlendum uppruna. Meginmarkmið verkefnisins er tvíþætt: Annars vegar er lögð áhersla á að skoða hvernig fagleg gildi og nálganir þroskaþjálfa styðja þá í störfum sínum með börnum af erlendum uppruna í grunnskólum. Hins vegar að draga fram þær áskoranir er þroskaþjálfar mæta á þeim vettvangi sem og þau bjargráð og þekkingu sem gætu hvað best stutt þá í störfum sínum þessum börnum til handa. Ritgerðin skiptist í fræðilegan hluta og rannsóknarhluta. Í fræðilega hlutanum er m.a. fjallað um lykilhugtök í fjölmenningarfræðum og rannsóknir sem beina sjónum að faglegum sjónarmiðum og nálgunum sem eru talin stuðla að góðum árangri í fjölmenningarlegri kennslu og þjónustu í grunnskólastarfi. Í rannsóknarþættinum var stuðst við eigindlega rannsóknaraðferð og viðmælendur voru fimm talsins, í viðmælendahópnum voru þroskaþjálfar, skólastjórnendur og kennsluráðgjafi. Niðurstöður gefa til kynna að þroskaþjálfar sem starfa í þjónustu við nemendur af erlendum uppruna í grunnskólum þurfa að vera meðvitaðir um ólíka menningu og bakgrunn, siði og viðhorf. Fram kom að mikilvægt væri að dýpka þekkingu og færni á málþroska og máltöku barna og þá sérstaklega hvernig þau læra nýtt tungumál. Í þjónustu við foreldra barna af erlendum uppruna er mikilvægt að starfsfólk sýni virðingu í starfi svo það skapist gott og árangursríkt samstarf milli skóla og heimilis. Að lokum sýna niðurstöður að hugmyndafræði fjölmenningarlegrar menntunar þar sem útgangspunkturinn er virðing og jöfnuður til náms samræmist vel þeirri hugmyndafræði er leiðir störf þroskaþjálfa sem grundvallast á félagslegu réttlæti, jafnri þátttöku og valdeflingu. Því má færa rök fyrir því að fagþekking þroskaþjálfa sé mikilvæg í starfi með börnum af erlendum uppruna í grunnskólum