Leiðir til þess að mæla árangur markaðssetningar á samfélagsmiðlum

Markaðssetning á samfélagsmiðlum hefur notið mikilla vinsælda á síðustu árum. Samfélagsmiðlar hafa verið í stöðugri þróun og skapað góð tækifæri fyrir markaðsstjóra fyrirtækja til að fara fjölbreyttar leiðir og auka samskipti sín við neytendur. Samfélagsmiðlar hafa reynst vel sem tækifæri til orðspors- og vörumerkjauppbyggingar. Þar deila neytendur ýmsum upplýsingum sem fyrirtæki geta nýtt sér í hag. Samfélagsmiðlar eru í dag stór partur af hinu daglega lífi og hafa þeir mikil áhrif á samskipti fólks, rekstur fyrirtækja og neysluvenjur almennings. Mikil og hröð þróun hefur átt sér stað en stutt er síðan ekki var hægt að mæla árangur af markaðssetningu á samfélagsmiðlum. Þökk sé tækninni geta fyrirtæki nú nýtt sér allskyns upplýsingar sem fást á samfélagsmiðlum til mælinga. Þar fást meðal annars upplýsingar um mælikvarðana dekkun, viðbrögð og tíðni sem nýtast við árangurs- og arðsemismælingar í markaðssetningu. Þegar fyrirtæki markaðssetja sig á samfélagsmiðlum er mikilvægt að skýr markmið séu til staðar. Markmið sem algengt er að verði fyrir valinu eru: að auka sölu og/eða vörumerkjavitund, að bæta vörumerkjaímynd, að skapa meiri umferð á vefmiðlum, að lækka kostnað við markaðssetningu og að skapa gagnvirkni á miðlinum sem notaður er. Til eru margar gerðir af samfélagsmiðlum. Þeir sem njóta mestu vinsælda í dag eru Facebook, Instagram, Twitter og Snapchat. Mikilvægt er að fyrirtæki fylgist vel með árangri markaðssetningar á samfélagsmiðlum. Hægt er að mæla hann út frá endurgjöf og fjölda og tegundum athugasemda og birtinga á aðgangi fyrirtækja. Einnig er hægt að skoða smelli- og umbreytingahlutfall á vefsíðum þeirra. Með því að fylgjast vel með árangrinum er hægt að skoða hvað má gera betur, hvað er að virka og hvað ekki. Góðir markaðsstjórar hafa árangur að leiðarljósi og nýta sér þær upplýsingar sem gefast til viðeigandi aðgerða. Markmið þessarar ritgerðar er að skoða hvaða leiðir fyrirtæki gætu nýtt sér við mælingar á árangri markaðssetningar sinnar á samfélagsmiðlum. Niðurstöður leiddu í ljós að mælikvarðar eru margvíslegir og mjög háðir markmiði markaðsherferðar fyrirtækisins