Skilyrði sem umsækjendur um ættleiðingar þurfa að uppfylla: Með áherslu á aldur og heilsufar

Í ritgerðinni eru skoðuð þau skilyrði sem umsækjendur um ættleiðingar eða forsamþykki til ættleiðingar á erlendu barni þurfa að uppfylla, með áherslu á skilyrðin um aldur og heilsufar. Samanburður er gerður við skilyrði sem umsækjendur um tæknifrjóvgun og fósturforeldrar þurfa að uppfylla auk þess sem skilyrði í frumvarpi til laga um staðgöngumæðrun eru skoðuð. Þá eru skilyrði sem snúa að aldri og heilsufari umsækjenda um ættleiðingu á Norðurlöndunum skoðuð til samanburðar. Markmiðið með ritgerðinni er að rannsaka hvort skilyrði um aldur og heilsufar í lögum og reglugerðum um ættleiðingar hér á landi séu úrelt, í samræmi við önnur sifjalög sem og hvort þau séu í samræmi við önnur Norðurlönd. Einnig er kannað hvort skilyrðin séu of ströng eða of væg eftir að samanburður hefur verið gerður við ofangreind atriði. Efni ritgerðarinnar var rannsakað með því að skoða lög, reglugerðir og dóma eftir því sem við átti. Jafnframt voru rannsökuð nokkur íslensk mál til að varpa frekara ljósi á rannsóknarefnið en aðgangur fékkst að fimm málum hjá Sýslumanninum á höfuðborgarsvæðinu. Það má velta upp ýmsum spurningum varðandi skilyrðin og hversu strangar kröfur á að setja. Ef fleiri börn vantar foreldra, eru þá minni kröfur settar? Og nú til dags þegar fremur er vöntun á börnum til ættleiðingar eru skilyrðin þá strangari til að fá hæfari kjörforeldra? Því má velta því upp hvort skilyrði um aldur og heilsufar séu dæmi um of strangar kröfur eða nauðsynleg vegna gullnu reglunnar um að ávallt skuli hafa hagsmuni barns í fyrirrúmi