Først og fremst for å forstå det fullstendige nyheitsbildet : ein kritisk diskursanalyse av eigenreklame på TV2 og NRK

Denne oppgåva er ein kritisk diskursanalyse av fem eigenreklamar, promoar, tilknytt nyheitssendingar på TV2 og NRK. Gjennom analysen viser eg kva meiningspotensial og verknadspotensial desse tekstane har. Grunnhaldninga i dei to tv-kanalane viser seg i desse tekstane som svært ulik. Mens TV2 sin modellmottakar er ein god nordmann som betalar skatt av si lønn og elles ventar at staten skal ordne opp, er NRK sin modellmottakar ein ansvars- og sjølvmedviten person som likar å tru at NRK gir eit sant og fullstendig bilde av verda. Den underliggande forteljinga om livet som TV2-tekstane formidlar, går ut på at mottakaren ikkje har det gode liv, men ønskjer å få det. Staten utgjer den store hindringa for at dette skal skje ved ei håplaus forvalting av skattepengane. Heldigvis hjelper TV2 tv-sjåarane. Denne hjelpa går ut på å få tv-sjåarane til å forstå at dei ikkje har det gode liv. Dermed konserverer TV2-tekstane ei passiv haldning til livet og eit svært snevert bilde av verda. NRK-teksten er meir fokusert på avsendar enn på mottakar. Denne teksten ønskjer å skape og/eller stadfeste eit bilde av NRK som den seriøse nyheitsformidlaren. Teksten formidlar derfor saker, og logos og etos pregar argumentasjonen. Dette gjer at bildet av verkelegheita blir meir fullstendig enn til dømes den som kjem fram i TV2 sine tekstar. Likevel argumenterer eg for at verknadspotensialet til denne teksten ikkje er av fornyande art, fordi teksten er meir fokusert på avsendar sitt sjølvbilde enn på å engasjere mottakar