Rannsóknir á sálrænni meðferð

Neðst á síðunni er hægt að nálgast greinina í heild sinni með því að smella á hlekkinn Skoða/Opna(view/open)Við meðferð á geðtruflunum er beitt margvíslegum meðferðarformum. Eitt þeirra er sálræn meðferð (psykóþerapía). Á seinni arum hafa kröfur aukist um að meðferð sýni árangur, í hvaða formi sem hún er. Rannsóknir hafa farið fram á árangri nokkurra tegunda sálrænnar meðferðar. Ýmsir erfiðleikar hafa komið fram við þessar rannsóknir. Markmið ólíkra meðferðarforma geta verið mismunandi og torveldað samanburð. Sumar niðurstöður má meta á hlutlægan hátt en aðrar ekki. Má taka sem dæmi meðferð flughræðslu. Geti einstaklingur ferðast með flugvél án óþæginda að lokinni meðferð má segja að meðferð hafi borið árangur. Erfiðara er að meta árangur, sé markmiðið að bæta tengsli milli hjóna, bæta sjálfsímynd eða breyta persónuleika. Venjan hefur verið að sá sem meðferð stundar og/eða sjúklingur meti bata eftir að meðferð lýkur og það notað til vitnis um árangur meðferðar. Ýmislegt mælir gegn því að nota slíkt mat á árangri meðferðar. Minni og persónulegir hagir geta haft áhrif og skekkt myndina. Vænlegra er að láta einstakling meta tilfinningar, hugsanir og atferli fyrir meðferð, með vissu millibili á meðan og eftir að meðferð lýkur. Það ber einnig að hafa í huga að viðkomandi kann að finnast hann vera siðferðilega skuldbundinn meðferðaraðila. Hann þurfi að sýna árangur vegna tímans og kostnaðarins sem varið hefur verið í meðferðina. Að auki getur afstaða gagnvart meðferðaraðila verið jákvæð vegna veittrar aðstoðar. ..