Tæknisnjöll börn : verkefnasafn fyrir leikskóla

Upplýsingatækni er orðin hluti af hversdagsleika barna og fullorðinna. Það skiptir máli að börnin læri að meðhöndla tæknina á viðeigandi hátt. Kennarar gegna þar lykilhlutverki að færa tæknina inn í leikskólana. Reynsla okkar höfunda er að maður er líklegri til að nota efnivið og verkfæri ef hann hefur eitthvað til að styðja við eins og verkefnalýsingar. Því ákváðum við að búa til heimasíðu þar sem við myndum safna saman verkefnalýsingum sem bæði við og aðrir gætum notað. Leitað var að hugmyndum að verkefnum bæði á íslenskum og erlendum vefsíðum. Hugmyndirnar voru þróaðar og að lokum voru skipulagðar sjö verkefnalýsingar. Verkefnin miða að því að börn geti nýtt upplýsingatækni á skapandi hátt í tengslum við útinám, vísindi og læsi. Verkefnin voru prófuð á tveimur leikskólum og þróuð áfram. Reynsla okkar sýndi að verkefnin ganga vel með leikskólabörnum, þau voru áhugasöm og skemmtu sér ágætlega. Verkefnalýsingarnar má finna á vefsíðunni: https://snjollborn.com