Hinn leyndi þráður. Hvar liggja mín spor.

Markmiðið með ritgerð þessari er að kanna þörf fólks sem ættað er úr Vöðlavík á Austfjörðum til að sækja staðinn heim. Á árum áður voru allnokkrir bæir í víkinni en hún hefur nú verið í eyði frá því á sjöunda áratug síðustu aldar. Hvað er það sem knýr þörfina áfram? Er það til þess að grafast fyrir um rætur sínar? Hvernig upplifir fólkið tengslin við staðinn? Ritgerðin byggir á viðtölum afkomenda fólks sem bjó í Vöðlavík og þau eru túlkuð og greind í ljósi hugtakanna hópur, samskiptaminni og staður. Þessi hugtök henta vel til að greina hvort og hvernig það skipti fólk máli að vera hluti af hópi sem á ættir sínar að rekja til staðar. Í rannsókninni er sjónum beint að því hvernig minningar úr Vöðlavík hafa færst á milli kynslóða og þeim staðartengslum sem viðhaldið er af afkomendum ábúenda. Aðalrannsóknarspurningin er: Eftir hverju er fólk að sækjast þegar það ferðast á slóðir forfeðra sinna? Niðurstöður rannsóknarinnar sýna hvernig forvitni hvetur fólk til að fara á æskuslóðir genginna ættingja. Forvitni um svæðið sem það hefur heyrt talað um frá barnæsku. Menn reyna að sjá fyrir sér hvernig lífið hafi verið þegar fólkið þeirra var að hlaupa um túnin og víkin iðaði af lífi