Hvernig konur björguðu galdraheiminum. Valdeflandi konur og birtingarmynd þeirra í galdraheimi Harry Potter

Fyrir þrjátíu árum byrjaði J.K. Rowling að skrifa fyrstu bókina um galdrastrákinn Harry Potter, vini hans og öll þau ævintýri sem á vegi þeirra verða. Enn þann dag í dag eru þetta einar af vinsælustu ungmennabókum sem gefnar hafa verið út. Lesendur kynnast hinum ýmsu hetjum og illmennum í gegnum bækurnar en það sem skoðað verður í þessari ritgerð eru hinar sterku kvenhetjur sem finna má í bókaflokkinum. Skoðaðar verða hugmyndir samfélagsins um hlutverk barnabókmennta áður fyrr og hvers konar breytingar hafa átt sér stað hvað varðar kröfur og væntingar sem gerðar eru til kvenna í bókmenntum. Kvenhetjur Harry Potter bókaflokksins verða settar í samhengi við þau gildi sem gömlum kvenhetjum voru sett og skoðað hvort þær falli inn í hefðbundnar staðalímyndir eða hvort þær brjótist út fyrir þann ramma. Kvenhetjurnar verða skoðaðar út frá hlutverkum þeirra og áhrifum á söguna en einnig sem einstaklinga innan samfélags út frá eiginleikum og framkomu. Teknar verða fyrir nokkrar af fjölmörgum kvenhetjum bókanna og þær skoðaðar út frá þessum gildum og fyrirfram gefnu hugmyndum um hlutverk konunnar innan bókmennta. Markmið þessarar ritgerðar er að komast að niðurstöðu um það hvort Harry Potter bækurnar séu uppfullar af staðalímyndum hvað varðar kvenhetjur eða hvort hér séu á ferðinni valdeflandi konur og góðar fyrirmyndir fyrir ungan lesendahóp