Hið gullna jafnvægi, samræming starfs og einkalífs: Hver urðu afdrif verkefnisins Hið gullna jafnvægi sem unnið var í samstarfi Reykjavíkurborgar, Gallup og 35 fyrirtækja um aldamótin og hvað hefur breyst?

Lokaverkefnið er lokað í þrjú ár með samþykki Viðskiptafræðideildar.Ritgerðin fjallar um verkefnið Hið gullna jafnvægi en það var unnið í samstarfi Reykjavíkurborgar, Gallup og 35 fyrirtækja um aldamótin 2000. Um var að ræða fræðsluverkefni sem varð tímamótaverkefni á sviði mannauðsstjórnunar hér á Íslandi. Verkefnið átti rætur að rekja til Bretlands og var hluti af stærra verkefni sem styrkt var af Evrópusambandinu, framkvæmt í þremur öðrum löndum á sama tíma og stóð yfir í heilt ár. Með þátttökunni tóku fyrirtækin þátt í fræðslu- og þjálfunaráætlun sem miðaði að því að koma á auknum sveigjanleika í fyrirtæki og finna hið gullna jafnvægi milli starfs og einkalífs. Markmið rannsóknarinnar í ritgerðinni var að rannsaka hver afdrif verkefnisins urðu hjá þátttökufyrirtækjunum, hvort því hafi verið fylgt eftir eftir að þátttökunni lauk og hvaða áhrif þátttakan hafði fyrir fyrirtækin. Kannað var hvað fyrirtækin gera nú á dögum til að auðvelda starfsmönnum að samræma starf og einkalíf og hvað hefur breyst. Framkvæmd var eigindleg rannsókn þar sem tekin voru hálfopin viðtöl við átta viðmælendur. Niðurstaðan bendir til þess að verkefnið hafi haft bæði bein og óbein áhrif á starfsemi fyrirtækjanna. Fimm viðmælendur greindu frá því að verkefninu hefði verið fylgt óformlega eftir. Einn viðmælandi greindi frá því að verkefninu hafi fyrst um sinn verið formlega fylgt eftir, fyrirtækið væri enn mjög meðvitað um þetta og verkefnið lifði í raun enn. Svör viðmælenda voru mismunandi um hvað hefði breyst hjá sínu fyrirtæki til að auðvelda starfsfólki að samræma starf og einkalíf en hjá öllum, nema einum, kom fram að miklar breytingar hefðu orðið. Hvað breytingar í samfélaginu varðar þá töluðu allir nema einn um að tæknin hefði breyst mikið og sömuleiðis áhrif hennar á líf starfsmanna. Fjórir viðmælendur töluðu um viðhorfsbreytingu í samfélaginu. Fólk væri meðvitaðra um jafnvægið á milli starfs og einkalífs og nú á dögum væri meira umburðarlyndi vegna þarfa starfsmanna