Nye ord i ei ny verd: Kodeveksling i romanar om nordmenn og svenskar i Amerika

Artikkelen handlar om kodeveksling i skjønnlitteratur og tek opp tekstar av tre ulike forfattarar for å drøfte dette. O.E. Rølvaag blir rekna som den fremste av dei norsk-amerikanske forfattarane i Midtvesten, så hans innvandrarepos skrive på 1920-talet er utgangspunktet. Den svenske forfattaren Vilhelm Moberg skreiv på 1950-talet sitt epos om svenske innvandrarar til Minnesota der han brukar stadig meir kodeveksling utover i verket for å skape eit truverdig bilete av utviklinga og karakterane. Bøkene førte til ein heftig diskusjon mellom lingvisten Einar Haugen og diktaren Vilhelm Moberg om dette språket. Debatten inneheld heilt sentrale perspektiv på skjønnlitteratur og kodeveksling. Ein samtidig av Rølvaag i det norsk-amerikanske miljøet blir så trekt fram, Johannes B. Wist, som er særleg lydhøyr overfor blandingsspråket og nyttar det som viktig element i person- og miljøskildringa. Hovudfokus i artikkelen er ei undersøking av korleis kodeveksling i ein kontaktsituasjon mellom to språk kan nyttast kunstnarleg i narrativar om migrasjon og kulturmøte