MAKSIM KERJASAMA SAJRONE PAGELARAN WAYANG DHALANG KI KONDHO SRINAN JOYO ALIAS SUN GONDRONG

Abstrak                 Analisis tumrap sawijining kajian pragmatik wis kerep ditindakake ing panliten sadurunge. Aspek pragmatik mligine wujud maksim kerjasama wacana kang ana sajrone pagelaran wayang kulit dhalang Ki Kondho Srinan Joyo alias Sun Gondrong perlu antuk kawigaten. Wacana pedhalangan sajrone pakeliran iki yen dideleng saka basane sing santai lan akrab, amarga anane wacana sing ora serius nganti guyon sarta eyel-eyelan kuwi ancas kanggo nglipur pandhemen. Saliyane kuwi amarga akeh bangart makna-makna sing ora jelas tur ambigu ing wacana kasebut ndadekake aspek pragmatik akeh ragame. Saka kahanan iki bisa narik kawigaten panliti kanggo nliti bab kasebut. Mula panliten iki bakal ngrembug (1) Kepriye wujud basa aspek Maksim Kerjasama ing Wayang Kulit Dhalang Ki Kondho Srinan Joyo alias Sun Gondrong? (2) Kepriye wujud basa penyimpangan aspek Maksim Kerjasama ing Wayang Kulit Dhalang Ki Kondho Srinan Joyo alias Sun Gondrong? Panliten iki nggunakake metode dheskriptif. Tegese dhata-dhata diklumpukake banjur diperang maneh dadi rumusan masalah, sawise kuwi dianalisis adhedhasar prinsip kerjasama Grice. Dhata sajrone panliten iki arupa wacana pedhalangan wayang kulit dhalang Ki Kondho Srinan Joyo  kang ngandhut unsur humor. Cara ngumpulake dhata ing panliten iki yaiku kanthi nggunakake metodhe nyemak, sawise kuwi kanthi cara nyatet. Asile panliten iki yaiku (1) Wujud basa aspek kerjasama ing wayang dhalang Ki Kondho Srinan Joyo alias Sun Gondrong ngemot maksim kualitas, maksim kuantitas, maksim relevansi, sarta maksim cara/pelaksanaan. Penyimpangan aspek pragmatik kerjasama kang ana sajrone Basa Wayang Ki Kondho Srinan Joyo alias Sun Gondrong, nyakup penyimpangan (1) maksim kerjasama kualitas, (2) maksim kuantitas, (3) maksim relevansi, lan (4) maksim cara/pelaksanaan.   Tembung wigati: Analisis wacana, wacana kritis, pragmatisme, lan idheologi