Lífið er töff : lífsleikninámskeið í vinnuskóla fyrir níundabekk

Verkefnið sem hér er lagt fram felur annars vegar í sér námskeiðið „Lífið er töff” og hins vegar greinargerð til stuðnings við námskeiðið. Námskeiðið er byggt upp á hugmyndum um lífsleikni og félagsuppeldisfræði og er samið fyrir ungmenni í 9. bekk grunnskóla. Lengd námskeiðsins er sex tímar á dag yfir fimm daga tímabil og miðar að því að hægt sé að halda það á vinnuskólatíma unglinga á sumrin. Dögunum er skipt upp í þemu sem tengjast mörgum viðfangsefnum, svo sem hópefli, samskiptum, tjáningu, fjármálum, vinnumarkaði, lýðræði, stjórnmálum, leiðtogum, heilsu og heilbrigðum og óheilbrigðum samböndum. Greinargerðin segir frá grundvallaratriðum í lífsleiknikennslu og mikilvægi félagsuppeldisfræði er kemur að kennslu í henni. Farið er yfir hlutverk tómstunda- og félagsmálafræðinga á vettvangi lífsleikni og sagt stuttlega frá meginatriðum námskeiðsins „Lífið er töff”. Lykilorð: Lífsleikni, unglingar, félagshæfni, reynslunám, félagsuppeldisfræði, námskeið, leiðtogi, samskipti, hópar, fjármál, vinnumarkaður, lýðræði, heilsa, sjálfsmynd, sjálfstraust