Staða innflytjenda á íslenskum vinnumarkaði

Viðfangsefni þessarar heimildaritgerðar eru innflytjendur á íslenskum vinnumarkaði. Til að kanna stöðu þeirra innan hans verða meðal annars skoðaðar fjöldatölur um innflytjendur á íslenskum vinnumarkaði ásamt því hversu stór hluti innflytjenda á Íslandi er atvinnulaus. Skoðað verður hvort að innflytjendur fái menntun sína metna hérlendis, við hvernig störf þeir vinni helst og hvort þeir verði fyrir fordómum á vinnumarkaðnum. Einnig verður fjallað um réttindi þeirra og þjónustu við þá sem tengd er vinnumarkaði. Síðast en ekki síst verður vinna félagsráðgjafa með innflytjendum skoðuð þar sem meðal annars verður tekið fyrir mikilvægi atvinnuþátttöku og félagslegrar virkni og vistfræðikenning Bronfenbrenner skoðuð en í henni er lögð áhersla á samspil einstaklings og umhverfis hans. Rannsóknarspurningarnar eru: Hver er staða innflytjenda á íslenskum vinnumarkaði? og Hver er aðkoma félagsráðgjafa að vinnumálum innflytjenda? Helstu niðurstöður ritgerðarinnar gefa til kynna að víða er pottur brotinn í innflytjendamálum þar sem meðal annars stór hluti innflytjenda hér á landi verður á einhvern hátt fyrir barðinu á fordómum eða mismunun á vinnumarkaði. Innflytjendur á íslenskum vinnumarkaði vinna í flestum tilfellum láglaunastörf sem þeir fá alla jafna minna borgað fyrir en íslendingar og þeir eru sá hópur sem á mestri hættu á að vera svindlað á af vinnuveitendum. Hérlendis hefur lítið verið skrifað um vinnu félagsráðgjafa með innflytjendum og það er því eitthvað sem þörf er á að rannsaka frekar