Tjón af völdum ágangs álfta og gæsa á ræktað land

Viðfangsefni þessarar ritgerðar er tjón af völdum ágangs álfta og gæsa á ræktað land þar sem leitast verður við að svara spurningum hvort bændur verði fyrir tjóni, hvort þeir verjast því og hvernig það gangi. Megin markmiðið var að draga saman upplýsingar um tjón af völdum beitar álfta, grágæsa og heiðagæsa og einnig að skoða notkun varna gegn fuglabeit og reynslu af þeim. Gerður var spurningalisti og svörum safnað frá 44 bændum úr þremur hreppum; Fljótsdalshreppi á Fljótsdalshéraði, Grýtubakkahreppi í Eyjafirði og Hrunamannahreppi í Árnessýslu. Tæplega 98% bændanna sem svöruðu telja sig verða fyrir tjóni að einhverju leiti af völdum ágangs álfta og gæsa. Niðurstöður rannsóknarinnar sýna að þörf er á að finna lausn fyrir bændur til að stemma stigu við ágangi álfta og gæsa. Umfang tjóna var mjög breytilegt milli hreppa. Í Fljótsdalshreppi var umfang tjóna að mati bænda talið hvað mest vegna áhrifa frá Kárahnjúkavirkjun. Í Grýtubakkahreppi var tjón metið í meðallagi mikið, þar verður helmingur jarðanna fyrir verulegum ágangi gæsa og álfta en hinn helmingurinn sleppur með lítinn ágang. Bændur í Hrunamannahreppi telja sig verða fyrir tjóni en ekki mjög miklu. Margir bændanna eða 89% notast við einhverjar varnir til að verjast tjóni í ræktarlöndum sínum. Sömu varnirnar hafa verið notaðar á Íslandi í mörg ár, fuglarnir eru farnir að þekkja þær og eru því ekki að fælast frá ræktarlöndum eins og þeir ættu að gera