Kynjajafnrétti í íþróttum: menntun, reynsla og laun meistaraflokksþjálfara

Markmið rannsóknarinnar var að skoða kynjajafnrétti í íþróttum með því að athuga tengslin launa og kyns meistaraflokksþjálfara í knattspyrnu, handknattleik og körfuknattleik. Settar voru fram þrjár rannsóknarspurningar þar sem skoða átti laun þjálfara út frá menntun, reynslu, kyni þjálfara og hvort hann væri að þjálfa karla eða kvennalið. Sendur var út spurningalisti á alla þjálfara í tveimur efstu deildum í fyrrnefndum boltagreinum. Þátttakendur voru aðeins 36, fimm konur og 31 karlar og svörun aðeins 31% yfir heildina. Helstu niðurstöður voru þær að ekki fundust tengsl á milli menntunar og reynslu út frá kyni þjálfara eða kyni liðs sem hann þjálfar. Aftur á móti kom í ljós að yfir heildina voru kvenkyns þjálfarar með lægri laun en karlkyns þjálfarar. Ekki var munur á milli launa hjá þeim sem þjálfa karla- eða kvennalið. Erfitt er að draga ályktanir að um kynjamisrétti sé að ræða en þessi niðurstaða gefur vísbendingar um að þetta sé verðugur rannsóknarvettvangur. Áhugavert væri að sjá niðurstöður frekari rannsókna þar sem svörun væri hærri sem gæti skapað viðeigandi breytingar og umræður um jafnrétti kynjanna innan íþróttahreyfingarinnar