Þegar sorg ber að. Er munur á sorg þegar dauðsfall er skyndilegt eða eftir langvarandi veikindi?

Útskrift júní 2013.Áföll og sorg gera sjaldnast boð á undan sér. Þegar fólk upplifir sorg getur það upplifað ýmsar tilfinningar bæði andlega og líkamlega. Þegar börn eiga í hlut skiptir miklu máli að bregðast rétt við svo þau komist heil í gegnum áfallið. Þessi ritgerð fjallar um sorg vegna dauðsfalls. Hér verður hugtakið sorg skilgreint og tvær rannsóknarspurningar eru hafðar að leiðarljósi, en þær eru: Er munur á sorg vegna skyndilegs dauðdaga eða þegar um langan aðdraganda er að ræða? og Hvaða aðstoð er hægt að fá hér á landi og hvernig nýtist starf félagsráðgjafans í svona málum? Leitast verður við að svara þessum spurningum eins vel og auðið er. Farið verður yfir sorgarferli, kenningar tengdar sorginni og líkamleg einkenni. Farið verður sérstaklega vel yfir sorg barna og upplifun þeirra af dauðanum. Skoðað verður hvernig viðbrögð fólks eru þegar dauðsfall er af völdum sjálfsvígs, slyss eða vegna langvarandi veikinda og hvort fólk geti byrjað að syrgja áður en að dauðsfallinu kemur þegar um veikindi er að ræða. Einnig er fjallað um hvaða stuðning fólk getur fengið þegar veikindi sem leiða til dauða eru til staðar, sálgæslu, bataferli og hvernig félagsráðgjafinn getur tekið á svona málum. Að lokum vil ég ræða hvaða aðstoð vantar fyrir fólk sem gengur í gegnum sorgarferli og hvað megi gera til að bæta úr því.