Samningar andstæðir lögum. Hefur 22. gr. húsaleigulaga nr. 36/1994 tilætluð réttaráhrif?

Eins og heiti ritgerðinnar gefur til kynna fjallar hún um hvort 22. gr. húsaleigulaga nr. 36/1994 hafi tilætluð réttaráhrif. Meginregla húsaleigulaganna kemur fram í 1. mgr. 2. gr. laganna. Kemur þar fram að óheimilt er að semja um að leigjandi íbúðarhúsnæðis taki á sig ríkari skyldur og öðlist minni réttindi en lögin mæla fyrir um nema ákvæði laganna hafi að geyma sérstök frávik þess efnis. Heimild til undantekningar frá meginreglunni kemur fram í 22. gr. Þar er aðilum veitt heimild til að semja sína á milli um að leigjandi taki á sið aukið viðhald innan íbúðar enda lækki leigugjaldið að sama skapi. Veitir þetta ákvæði aðilum meira samningsfrelsi sín á milli. Það sem kemur þó í ljós þegar samningar eru gerðir með vísan til 22. gr. er að leigufjárhæð lækkar ekki alltaf til móts við aukna viðhaldsskyldu og er því ekki leigutaka til hagsbóta. Í kafla tvö verður fjallað um samningarétt og það samningsfrelsi sem gildir á Íslandi og undantekningar frá því. Kafli þrjú fjallar um húsaleigulögin og farið verður yfir þróun húsaleigulöggjafar á Íslandi og húsaleigulögin sem eru í gildi í dag verða skoðuð. Einnig verður farið nánar í 22. gr. hsll. og gildissvið greinarinnar. Í fjórða kafla verður kærunefnd húsamála gerð ítarleg skil. Farið verður yfir efnisskilyrði og formskilyrði nefndarinnar og reifuð nokkur álit hennar. Í fimmta kafla verður íslensk dómaframkvæmd skoðuð. Sjötti og síðasti kaflinn fjallar um samanburð á norrænum rétti. Þar verða dönsku og norsku húsaleigulögin skoðuð og þau borin saman við íslensku húsaleigulögin. Skoðað verður hvort þau séu sambærileg hvað varðar formskilyrði, leiguverð og vernd leigutaka og leigusala hvað uppsögn og riftun húsaleigusamninga varðar. Viðhaldsskylda laganna verður einnig skoðuð og sérstaklega borin saman við ákvæði 22. gr. hsll. Í lok kaflans verða kærunefndir þær sem fram koma í norsku, dönsku og íslensku húsaleigulögunum bornar saman meðal annars skoðað hvort álit þeirra séu bindandi