Útikennsluverkefni fyrir leikskólann Lönguhóla á Höfn í Hornafirði

Fylgiskjal: Verkefnasafn fyrir leikskólann Lönguhóla á Höfn í HornafirðiÞetta verkefni er lokaverkefni til B.Ed.-prófs í leikskólakennarafræðum við kennaradeild Menntavísindasviðs Háskóla Íslands. Verkefnið er tvíþætt. Annars vegar er greinagerð þar sem fjallað er um hvað aðalnámskrá leikskóla segir um útinám barna og nýtingu nærumhverfisins, þá er gerð grein fyrir hugtökunum útikennslu og útinámi, kenningum um nám og þroska barna og hvernig þær liggja uppbyggingu og mótun verkefnanna til grundvallar. Hins vegar er verkefnasafnið sjálft sem inniheldur 20 útikennsluverkefni þar sem nærumhverfi Hafnar er nýtt sem uppspretta náms barnanna. Verkefnin henta einna helst fyrir elstu börn leikskólans þótt sjaldnast sé hægt að skilgreina ákveðinn aldur ef horft er út frá einstaklingsmiðun í skipulagi námsumhverfis barna. Tilgangur verkefnsins er að sýna hvernig hægt er að nýta nærumhverfið sem uppsprettu náms ungra barna og tengja við þau tækifæri sem liggja í nærumhverfinu á Hornafirði. Þau felast meðal annars í sérstöðu bæjarins og tenglsum hans við sjávarútveg og nálægð við náttúruöflin, jökulinn, tignarleg fjöll, skóglendi, eyjarnar úti fyrir ströndinni og tjarnirnar á svæðinu. Á Hornarfirði er einnig fjölbreytt fuglalíf og stutt er að fara til að sjá flest íslensk húsdýr. Því er óhætt að segja að sérstaða bæði leikskóla og grunnskóla á svæðinu sé allnokkur enda flest tækifærin í göngufæri barnanna sem hægt er að nýta sér á Hornafirði