Flýgur hver eins og hann er fiðraður? Áhrif andlitsfegurðar og kynferðis á ráðningar og laun

Í rannsókn þessari var athugað hvort andlitsfegurð og kynferði umsækjenda hefði áhrif á ráðningarákvörðun og á þau laun sem þátttakendur væru tilbúnir til að bjóða umsækjendum. Notast var við megindlega rannsóknaraðferð. Í úrtakinu voru mannauðsstjórar 300 stærstu fyrirtækja á Íslandi. Fjórar útgáfur af spurningalistum voru lagðar fyrir rafrænt og voru listarnir eins fyrir utan myndir af karlkyns og kvenkyns umsækjanda, annars vegar aðlaðandi og hins vegar óaðlaðandi. Þátttakendur voru 143 talsins, 49% karlar og 51% konur. Flestir þátttakendur voru á aldursbilinu 41-50 ára eða 39,2%. Næst flestir eða 37,8% voru á aldursbilinu 31-40 ára. Aðaltilgátan um að fyrsta launatilboð til aðlaðandi umsækjenda væri hærra en til óaðlaðandi umsækjenda stóðst ekki. Einnig var athugað hvort aðlaðandi umsækjendur væru metnir hæfari til starfa og hvort þeir væru líklegri til að vera ráðnir en svo reyndist ekki vera. Launamunur greindist eftir kyni umsækjenda og buðu þátttakendur karlkyns umsækjendum hærri laun en kvenkyns umsækjendum og voru það kvenkyns þátttakendur sem mismunuðu umsækjendum frekar eftir kyni. Lykilhugtök: Andlitsfegurð, útlit, aðlaðandi, óaðlaðandi, laun, ráðningar, ferilskrá, kynbundinn launamunur, mismunun, staðalímyndir