Möguleg áhrif upptöku evru á íslenskan vinnumarkað með hliðsjón af sveigjanleika hans.

Markmið þessarar ritgerðar er að kanna möguleg áhrif upptöku evru á íslenskan vinnumarkað. Mikil umræða hefur verið um inngöngu í Evrópusambandið og Myntbandalag Evrópu á síðustu árum og hafa flestir einhverja skoðun á þessu málefni, ekki síst í kjölfar efnahagshrunsins haustið 2008. Því er áhugavert að skoða áhrif á þann hluta þjóðfélagsins sem snertir okkur öll, vinnumarkaðinn og þær breytingar sem kynnu að verða á honum í kjölfarið. Mikilvægt er að meta sveigjanleika á vinnumarkaði í þessu samhengi og eru flestir fræðimenn sammála um að sveigjanleikinn sé nauðsynlegur til að vega upp á móti þeim þáttum sem tapast við inngöngu í myntbandalag. Stiklað verður á stóru varðandi ferlið sem þjóðin þarf að fara í gegnum ákveði hún að taka upp evruna, bæði vegna inngöngu í ESB og EMU, auk þess sem Evrópuvæðing Íslands hingað til verður skoðuð. Kenningin um hagkvæm myntsvæði er höfð að leiðarljósi í þessari ritgerð og leitast er við að svara því hvort Ísland uppfylli skilyrði þeirrar kenningar eða ekki. Þá eru mögulegar breytingar á vinnumarkaðnum eftir aðild greindar með tilliti til búferlaflutninga, launamyndunar, samkeppni fyrirtækja, atvinnuleysis og samhverfni hagsveiflna. Að lokum er skoðuð reynsla annarra evrulanda vegna upptöku evrunnar og metið hvort heimfæra megi reynslu þeirra yfir á Ísland