Mansal: Hvað geta samfélög gert til að sporna gegn þessari glæpastarfsemi

Mansal hefur á síðustu árum verið að stór aukast og er í dag þriðja umfangsmesta alþjóðlega glæpastarfsemin, á eftir eiturlyfja- og vopnasölu. Um er að ræða brot á mannréttindum þar sem einstaklingar eru þvingaðir út í starfsemi eða þjónustu sem þeir hafa ekki samþykkt að veita. Mansal er yfirleitt dulið og er því oft erfitt að greina hverjir eru fórnarlömb þess. Manseljendur hafa uppi á fórnarlömbum sínum víðsvegar um heiminn en yfirleitt er um að ræða einstaklinga sem eru af lægri stéttum þjóðfélagsins. Seljendurnir flytja fórnarlömbin oft langt frá heimkynnum sínum, yfirleitt til ríkari landa þar sem þeir selja þau í vændi. Því betri sem almenn þekking á mansali er og því meira sem stjórnvöld vinna gegn mansali því betur gengur að fá heildræna mynd á umfang mansals sem og að stöðva þessa starfsemi. Í þessari heimildarritgerð verður sjónum aðallega beint að kynlífsmansali og helstu fórnarlömbum þess, sem yfirleitt eru konur og stelpur. Gert verður grein fyrir umfangi mansals og skoðað hverjir eru þolendur og hverjir eru gerendur þess. Einnig verður greint frá því hvaða þættir gera það að verkum að þessi starfsemi eykst sífellt og skoðað í hvernig samfélögum hún þrífst helst.