Vinnustaðamenning fyrirtækis á íslenskum heilbrigðismarkaði

Vinnustaðamenning er öflugt stjórntæki innan skipulagsheilda sem birtist í hegðun starfsfólks á vinnustöðum í gegnum gildi, venjur og hefðir. Hún er límið sem heldur skipulagsheildinni saman og hefur áhrif á samskipti starfsfólks við hvort annað, við viðskiptavini og ekki síst á samfélagið í heild sinni. Auk þess hafa rannsóknir sýnt fram á mikilvægi vinnustaðamenningar sem áhrifaþátt fyrir árangur og frammistöðu skipulagsheilda í starfsemi sinni. Markmið rannsóknarinnar er að skoða vinnustaðamenningu skipulagsheildar sem á sér langa sögu í íslensku viðskiptalífi. Til þess var notast við spurningalista Denison sem nýtist vel til að mæla vinnustaðamenningu og draga fram styrkleika og veikleika skipulagsheilda og sjá hvaða þætti þarf að styðja betur við til að ná fram betri árangri. Auk þess var gerður samanburður á viðhorfi starfsfólks til vinnustaðamenningar eftir ákveðnum bakgrunnsþáttum. Spurningalistinn skiptist í fjórar menningarvíddir sem mæla hlutverk og stefnu, samkvæmni og stöðugleika, þátttöku og aðild og aðlögunarhæfni. Í mars 2017 var hann lagður rafrænt yrir starfsfólk skipulagsheildarinnar. Alls svöruðu 70 starfsmenn og var svarhlutfall um 71%. Helstu niðurstöður rannsóknarinnar eru að vinnustaðamenning skipulagsheildarinnar einkennist af skýrri og markvissri stefnu. Starfsfólkið virðist þekkja vel tilgang og markmið hennar og nær að tvinna það saman við vinnu sína í daglegu starfi. Starfsfólk virðist hafa nokkuð frelsi til athafna og ákvarðanatöku sem hefur áhrif á starf þess. Það sem dregur hinsvegur úr þessum styrkleika er að ekki virðist takast nógu vel að útfæra stefnuna, samþætta hana og láta starfsmenn fylgja henni eftir. Rannsóknin sýndi einnig mun á viðhorfi starfsmanna til vinnustaðamenningar eftir starfsaldri og eftir því á hvaða sviði þeir unnu.Viðskiptafræðideild hefur samþykkt lokaðan aðgang að þessari ritgerð í eitt ár