Viðhorf skjólstæðinga til þjónustu iðjuþjálfa

Í dag eru einstaklingar farnir að gera kröfur um að vera þátttakendur í þeirri heilbrigðisþjónustu sem þeim er veitt og vilja taka ábyrgð á henni. Iðjuþjálfar hafa reynt að koma til móts við þessar kröfur með því að veita skjólstæðingsmiðaða iðjuþjálfun en hún leggur áherslu á samvinnu, gagnkvæma virðingu og samábyrgð iðjuþjálfa og skjólstæðins. Heimildir sýna að skjólstæðingsmiðuð iðjuþjálfun eykur árangur í iðjuþjálfun og ánægju skjólstæðinga með þjónustu iðjuþjálfa. Aðaltilgangur verkefnisins var að kanna viðhorf skjólstæðinga í endurhæfingu til þjónustu iðjuþjálfa með því að fá upplýsingar um hvort þjónusta iðjuþjálfa hafi verið skjólstæðingsmiðuð, hversu ánægðir skjólstæðingar voru með þjónustuna og hvort hún hafi borið árangur og þá hvernig. Spurningalisti var sendur til þátttakenda til að afla upplýsinga í rannsókninni. Úrtakið var 38 einstaklingar sem notið höfðu þjónustu iðjuþjálfa á Landspítala háskólasjúkrahúsi (LSH) Grensási og svöruðu 22 (58%) einstaklingar spurningalistanum. Lýsandi megindleg rannsóknaraðferð var notuð og niðurstöður settar fram í texta og myndum. Niðurstöður sýndu að viðhorf skjólstæðinga í endurhæfingu til þjónustu iðjuþjálfa var almennt jákvætt þar sem flestir þátttakendur voru ánægðir með þjónustuna og töldu að hún hafði borið árangur. Einnig voru sjö lykilþættir skjólstæðingsmiðaðrar iðjuþjálfunar að mestu leyti hafðir að leiðarljósi í þjónustu iðjuþjálfa en þremur þáttum var ekki nægilega vel mætt að mati þátttakenda. Af þessum niðurstöðum er hægt að sjá hvernig best er að haga þjónustunni eftir þörfum og óskum skjólstæðinga Lykilhugtök: Endurhæfing, skjólstæðingsmiðuð iðjuþjálfun, skjólstæðingar iðjuþjálfa, viðhorf og þjónusta iðjuþjálfa