Mansal. Yfirlit á þekkingu

Þessi ritgerð er lokaverkefni til B.A. prófs í Félagsráðgjöf frá Háskóla Íslands. Ritgerðin fjallar um mansal almennt og þekkingu á þessum málaflokki. Mansal er talin vera sú glæpastarfsemi sem er í hvað örustum vexti eins og staðan er í dag. Skilgreiningar á vændi og mansali eru skoðaðar og einnig hver tengslin á milli þessara tveggja „atvinnugreina“ eru. Farið er í umfang mansals í heiminum í dag og skoðuð tölfræði. Mansal á Íslandi hefur verið í umræðunni undanfarin ár, sérstaklega eftir mansals dóm sem féll í máli konu frá Litháen árið 2010. Það mál er skoðað sem og fleiri sem grunur lék á að væru mansalsmál. Lagaumhverfi og gagnsemi Palermó bókunarinnar er skoðuð og einnig Samningur Evrópuráðs um mansal. Laga- og reglugerðum var breytt fljótlega eftir að Ísland skrifaði undir Palermó bókunina til að hægt væri að fullgilda samninginn og er farið aðeins ofan í það. Aðkoma félagsráðgjafa sem og lögreglunnar að mansalsmálum getur verið gríðarlega mikilvæg ef þekking þeirra og undirbúningur er góður. Farið verður ofan í hlutverk þeirra er snýst að mansalsmálum. Fórnarlömb mansals verða oft fyrir miklum skaða, bæði líkamlegum og sálrænum. Áfallastreituröskun er algeng hjá fórnarlömbum mansals þar sem þau hafa búið við mikið harðræði og verið beitt ýmsum pyndingum. Sú aðstoð sem fórnarlömbum er boðin er skoðuð en þar sem lítið er um heimildir um mansal á Íslandi verður notast við rannsóknarskýrslur, stefnur og áætlanir. Notast er við bækur, bæði erlendar og íslenskar, og ritrýndar heimildir. Einnig er styðst við upplýsingar úr viðtali við Eddu Ólafsdóttur, félagsráðgjafa, sem sat í nefnd er kom að áætlun ríkisstjórnar Íslands um aðgerðir gegn mansali. Markmiðið með þessari ritgerð um mansal er að svara rannsóknarspurningunum hvert umfang mansals er í heiminum í dag og einnig hvort að Ísland er tilbúið til að takast á við þau mansalsmál sem gætu komið upp. Skoðuð verða fyrri mansalsmál og hvernig stofnanir og félagasamtök á Íslandi brugðust við þeim