Landfræðileg kortlagning á íslenskum sögnum

Sagnir tengjast samfélaginu sem sagði þær sterkum böndum en þær tengjast einnig landslaginu. Þetta erindi fjallar um nýlokið 30 eininga meistaraverkefni í þjóðfræði. Í verkefninu var Sagnagrunnur, gagnagrunnur yfir flestar íslenskar sagnir sem til eru á prenti, endurhannaður með sveigjanleika og nýja möguleika í huga. Langflestir staðir sem koma fyrir í þeim rúmlega 10.000 sögnum sem finna má upplýsingar um í grunninum hafa verið hnitsettir auk heimila heimildafólks. Einnig hefur nýtt vef-viðmót með gagnvirku korti verið hannað og forritað í kringum gagnagrunninn og býður það upp á fjölda möguleika til rannsókna á grunninum og landfræðilegri dreifingu sagna. Þar má sjá dreifingu sagna úr einstökum þjóðsagnasöfnum, dreifingu sagnasjóða einstakra heimildamanna, dreifingu sagna sem tengjast ákveðnum efnisorðum og innbyrðist tengsl efnisorða svo nokkur dæmi séu tekin. Þar má því finna ótal vísbendingar um ferðir fólks fyrr á öldum, samgang á milli landssvæða, dreifingu ákveðinna sagnaminna í samhengi við landslagið og um þjóðtrú Íslendinga. Ný útgáfa Sagnagrunnsins er því öflugt og nútímalegt rannsóknartæki sem nýst getur víða, jafnt innan ólíkra fræðigreina, í ferðaþjónustu og fyrir almenning