Fósturmissir á fyrsta þriðjungi meðgöngu: Þjónusta og þarfir kvenna á Kvennadeild Landspítalans

Meginmarkmið rannsóknarinnar var að öðlast innsýn í hvar þarfir kvenna eftir fósturmissi á fyrsta þriðjungi meðgöngu liggja. Þessari rannsókn er ætlað að vera framlag til frekari þróunar og þekkingar á málefninu og að varpa ljósi á mikilvægi þess að konur sem missa fóstur á fyrsta þriðjungi meðgöngu hafi greiðan aðgang að faglegri aðstoð og eftirfylgni sem miðar að þörfum þeirra. Niðurstöður þessarar rannsóknar geta gefið gagngóðar vísbendingar um þarfir kvenna eftir fósturmissi, og um leið aukið skilning og þekkingu fagfólks og þar af leiðandi mögulega skilað betri þjónustu. Framkvæmd var eigindleg viðtalsrannsókn þar sem tekin voru stöðluð viðtöl við átta konur á aldrinum 25 til 36 ára. Rannsóknarspurningin var: Hverjar eru þarfir kvenna eftir fósturmissi á fyrsta þriðjungi meðgöngu á Kvennadeild Landspítalans? Niðurstöður rannsóknarinnar gefa vísbendingar um að þörf er á ítarlegri upplýsingagjöf eftir fósturmissi á fyrsta þriðjungi meðgöngu. Þá virðist vera þörf fyrir stuðning frá maka og/eða nánustu aðstandendum í kjölfar fósturláts. Svo virðist vera að þörf sé fyrir faglegan stuðning á meðan á dvöl þeirra á spítalanum stendur sem og eftirfylgni. Auk þess gefa niðurstöður rannsóknarinnar til kynna að þörf sé fyrir að ákveðnum þáttum varðandi þjónustuna, umhverfið og aðstöðuna sé breytt og þeir aðlagaðir að þörfum kvenna eftir fósturmissi á fyrsta þriðjungi meðgöngu. Lykilorð: Fósturlát, þarfir, þjónusta, félagsráðgjöf