Aðstæður kvenna í háskólanámi með tilliti til samþættingar náms og fjölskyldulífs

Rannsóknin er BA-ritgerð í bókasafns- og upplýsingafræði við Háskóla Íslands. Notuð var eigindleg aðferðafræði þar sem tekin voru opin viðtöl við tíu konur og gerðar tvær þátttökuathuganir. Skoðuð var upplifun kvenna í háskólanámi út frá samþættingu náms og fjölskyldulífs. Sérstök áhersla var lögð á aðstæður mæðra sem glíma oft á tíðum við margþætt hlutverk. Menntun kvenna var skoðuð í sögulegu samhengi og því velt upp hvort jafnrétti hafi náðst hvað varðar umönnun barna og rekstur heimilis. Rannsóknin sýnir að aðgengi kvennanna að námi hefur batnað, jafnrétti hefur enn ekki náðst og mikil togstreita myndast á milli heimilislífs og náms. Greinilegt er að það þarf að huga vel að þessum hópi með tilliti til sveigjanleika í námi og góðra upplýsinga í upphafi náms