Með því að vinna vinnuna mína læri ég. Rannsókn á starfstengdum lærdómi millistjórnenda við innleiðingu nýrra verkefna

Í þessari rannsókn er sjónum beint að starfstengdum lærdómi hjá umsjónarmönnum frístundaheimila ÍTR. Markmiðið er að greina hvernig þessir stjórnendur lærðu að takast á við starfið sitt við innleiðingu á nýju verkefni. Í rannsókninni er leitast við að greina hvaða þættir leiddu til eða studdu við lærdóm hjá þessum einstaklingum. Að auki er leitast við að kanna hvaða lærdómur felst í því að takast á við erfið viðfangsefni og hindranir. Í upphafi rannsóknarinnar var notast við eigindlega rannsóknaraðferð með opnum, hljóðrituðum viðtölum, þar sem álits var leitað hjá þremur starfandi umsjónarmönnum frístundaheimila. Viðtölin voru innihaldsgreind og dregin upp athyglisverð atriði og samsvörun milli þeirra. Helstu niðurstöður voru notaðar til grundvallar við undirbúning megindlegrar rannsóknar. Þá var notuð megindleg rannsóknaraðferð með því að leggja spurningakönnun fyrir alla umsjónarmenn frístundaheimilanna. Niðurstöður rannsóknarinnar gefa til kynna að samstarf og samvinna við aðra stjórnendur ásamt fyrri reynslu hefur reynst þessum hópi millistjórnenda best við að læra starfið sitt. Þeir upplifa mikinn lærdóm við raunverulegar áskoranir og þegar aðrir stjórnendur miðla af reynslu sinni. Niðurstöður gefa að auki til kynna að það hvernig þessi hópur stjórnenda leysir sín daglegu verkefni er að miklu leyti sprottið af því sem þeir koma sjálfir með og gefa til starfsins. Við úrlausn verkefna byggja þeir á eigin reynslu, framtakssemi og metnaði og þeir eru drifnir áfram af miklum áhuga. Það er afar mikilvægt að skapa umhverfi og aðstæður sem styðja við lærdóm hjá einstaklingum en það er ekki síður mikilvægt að skapa vettvang þar sem þekkingunni er miðlað á milli fólks og sett í ákveðna ferla sem styður við og eflir raunfærni skipulagsheilda. Hjá ÍTR felast miklir lærdómsmöguleikar í þeim vettvangi sem millistjórnendur hafa á samstarfi og samvinnu innan skipulagsheildarinnar