Upplifun starfsmanna af innleiðingu straumlínustjórnunar

Straumlínustjórnun nýtur sífellt meiri vinsælda og fyrirtæki eru í auknu mæli að innleiða hana. Straumlínustjórnun er í stuttu máli stefna eða aðferð sem hefur að geyma mörg tól og tæki sem hjálpa fyrirtækjum að draga úr sóun, auka gæði, skilvirkni og framleiðni. Stjórnendur fyrirtækja verða að hafa í huga að straumlínustjórnun skilar ekki árangri ef starfsfólkið breytir ekki starfsháttum sínum eða sýnir andstöðu. Það gefur því auga eið að við innleiðingu straumlínustjórnunar er mikilvægt að huga að breytingastjórnun og hvernig farið sé að þegar innleiddar eru breytingar innan fyrirtækis. Markmið þessarar ritgerðar er að kanna upplifun starfsmanna af innleiðingu straumlínustjórnunar. Efni ritgerðarinnar er tvíþætt en henni er skipt í fræðilegan kafla og rannsókn. Í fræðilega hlutanum er fyrst farið stuttlega yfir aðferðafræði straumlínustjórnunar, þar á eftir er farið yfir atriði sem er nauðsynlegt að hafa í huga þegar stefna er innleidd. Að lokum er farið yfir breytingastjórnun, hvað veldur andstöðu starfsmanna ásamt því að fara yfir átta þrepa breytingaferli Kotters. Tilgangur rannsóknarinnar var að kanna hvernig starfsmennirnir upplifðu innleiðingu straumlínustjórnunar. Rannsóknin fór þannig fram að send var vefkönnun á starfsmenn í fyrirtæki sem nýlega hafði innleitt straumlínustjórnun. Spurningunum var skipt upp í fjögur þemu sem samkvæmt fræðunum hafa áhrif á upplifun en þau voru þekking, þörf, innri starfsþættir og mat starfsmanna á árangri. Niðurstöður rannsóknar leiddu í ljós að upplifun starfsmanna var hvorki jákvæð né neikvæð, heldur nokkurn veginn í meðallagi. Stjórnendur fyrirtækisins þurfa að bæta upplýsingaflæði til starfsmanna ásamt því að skerpa á þekkingu þeirra með því að auka við þjálfun