Ástæður og áhrif endurkaupa íslenskra fyrirtækja á eigin hlutabréfum

Þessi ritgerð fjallar heildstætt um kaup fyrirtækja í Kauphöll Íslands á eigin bréfum á árunum 2014 til 2018. Skammtímaáhrif tilkynninga um fyrirhugaða framkvæmd endurkaupaáætlunar á hlutabréfaverð voru könnuð með atburðarrannsókn þar sem markaðslíkan og fyrirliggjandi gögn voru notuð. Niðurstöður gáfu til kynna að 3,74% umframávöxtun eigi sér stað dagana í kringum tilkynninguna en það er í samræmi við niðurstöður sambærilegra rannsókna á erlendum mörkuðum. Umframávöxtunin hérlendis kemur fram nokkru áður en tilkynning er birt opinberlega sem bendir til upplýsingaleka. Þvert á niðurstöður erlendra rannsókna fékkst ekki stuðningur við þá tilgátu að umframávöxtun sé hærri eftir því sem tilkynnt er um hærra hlutfall endurkaupa af hlutafé en fylgnigreining var framkvæmd til að prófa tilgátuna. Einnig voru tekin hálfstöðluð djúpviðtöl við stjórnendur á fjármálasviðum íslenskra fyrirtækja. Niðurstöður viðtalanna afhjúpuðu helstu ástæður fyrir því að íslensk fyrirtæki endurkaupa eigin hlutabréf. Þær eru skattalegt hagræði fyrir hluthafa, ákjósanleg fjármagnsskipan fyrirtækis, ákall lífeyrissjóðanna sem hluthafa um endurkaup frekar en auknar arðgreiðslur sem og minnkun umboðsvanda. Viðmælendur sögðu endurkaup ýmist koma í stað arðgreiðslna eða að þau væru viðbót við annars formfasta arðgreiðslustefnu til að greiða út tímabundið fjárstreymi til hluthafa