Markaðssetning á íslenskum eldislaxi á erlendum mörkuðum

Landbúnaður á Íslandi hefur verið ein af mikilvægustu atvinnugreinum Íslands alla tið, þessi atvinnuvegur snýst um að yrkja landið og rækta dýr til manneldis. Laxeldi hefur um langt skeið fallið undir landbúnað. Auðlindin í sjónum gegnum áratugina hefur breytt þjóðinni frá því að vera ein fátækasta þjóð í Evrópu í byrjun 19.aldar í að vera ein af efnuðustu þjóðum heims um aldamót 2000. Það hefur verið í umræðunni hjá helstu fiskeldisfyrirtækjum Íslands að taka upp sameiginlegt vörumerki til að markaðssetja eldislax á erlendum mörkuðum. Því er áhugavert að rannsaka hvernig þessi fyrirtæki sjá fyrir sér samvinnu og ávinning þess að taka upp sameiginlegt vörumerki með áherslu á markaðssetningu. Ritgerð þessi er byggð á eigindlegri rannsókn þar sem rannsakandi tók viðtöl við starfsmenn helstu fiskeldisfyrirtækja Íslands, og leitast eftir að fá innsýn í skoðun þeirra á viðfangsefninu. Viðmælendur voru sammála um að forsenda væri fyrir því að skapa eina sterka ímynd um íslenskan eldislax á erlendum mörkuðum. Á Íslandi eru ósnortin víðerni ásamt stórum, ómenguðum fjörðum með sterka sjávarstrauma sem bjóða upp á ferskleika. Allt eru þetta atriði sem notast má við þegar kemur að markaðssetningu afurða. Á marga þessara þátta hefur verið spilað við markaðssetningu á sviði ferðamennskunar. Samkvæmt viðmælendum er ímynd íslenska eldislaxins Ísland; íslenskur lax og íslenskar aðstæður. Í niðurstöðum kemur einnig fram að ávinningur fyrirtækjanna af góðri markaðssetningu og sterkari ímynd íslenska laxins væri í þágu fyrirtækjanna og þá má ekki gleyma að horfa á stóru myndina sem fólgin er í því að uppbygging íslensks laxeldis er stórt hagsmunamál fyrir þjóðfélagið. Laxeldi skapar gríðarlegar gjaldeyristekjur og mikill ávinningur er af því fyrir dreifðar byggðir á Íslandi