Fyrstu fasteignakaup - skelfing eða sæla? Viðbótarlífeyrir til fjármögnunar við fyrstu fasteignakaup

Fasteignakaup eru mikilvægasta og stærsta fjárfesting flestra á ævinni. Fæstir búa þó svo vel að eiga sjóð til fjármögnunar fyrstu fasteignakaupa þegar sá tími rennur upp og mjög erfitt getur verið að leggja fyrir. Hingað til hafa ekki verið mörg úrræði í boði sem stuðla að því að aðstoða landsmenn við þessa fjármögnun en aukin umræða í þjóðfélaginu og slæmt ástand á húsnæðismarkaði urðu þó til þess að Leiðréttingin var sett fram árið 2014. Með henni gátu landsmenn tímabundið ráðstafað viðbótarlífeyrissparnaði sínum til fjármögnunar fasteignakaupa eða til innborgunar á húsnæðislán. Viðbótarlífeyrissparnaður er vel fallinn til þess að ráðstafa í fjármögnun húsnæðis enda telst hann af mörgum vera hagstæðasta sparnaðarform sem völ er á, þá helst vegna skattalegs hagræðis og mótramlags launagreiðanda. Sumir hafa einnig verið að velta fyrir sér hvers vegna ekki er tekinn upp skyldusparnaður aftur, líkt og tíðkaðist frá 1953-1997, en þá var ungu fólki skylt að leggja hluta af launum sínum fyrir til að spara fyrir húsnæði. Mikil gagnrýni var á það fyrirkomulag svo ólíklegt verður að teljast að eitthvað sambærilegt verði tekið aftur í notkun í nákvæmlega sömu mynd. Það verður þó að teljast líklegt að eitthvað úrræði líti dagsins ljós á næstu árum þar sem stjórnmál og húsnæðismál eru mjög tengd og lausnir í húsnæðismálum sennilega eitt vinsælasta kosningaloforð stjórnmálaflokka á Íslandi. Það einmitt liggur fyrir að fjármála- og efnahagsráðherra leggi fram frumvarp á komandi þingi sem snýr að fjármögnun fasteignakaupa með viðbótarlífeyri í aðalhlutverki