Er lestrarkennsla að fara í hundanna? : getur notkun hunda í lestrarkennslu bætt árangur nemenda með lestrarörðugleika?

Í aldanna raðir hefur mannfólkið nýtt sér hunda til hinna ýmissu verka. Þeir ásamt öðrum dýrum hafa fengið hlutverk þjónustudýra þar sem þau aðstoða einstaklinga sem á þurfa að halda við ýmsa þætti daglegs lífs. Rannsóknir hafa sýnt að dýr geta haft róandi áhrif á einstaklinga í streituvaldandi aðstæðum. Þeir sem eiga við lestrarerfiðleika að stríða upplifa þá athöfn að lesa oft á neikvæðan hátt og það getur valdið streitu. Undanfarna áratugi hafa verið gerðar tilraunir til að nota hunda í lestri með börnum. Megintilgangur þessa verkefnis er að skoða hvort aðstoð hunda geti stuðlað að bættum árangri nemenda með lestrarörðugleika. Niðurstöður verkefnisins benda til þess að aðstoð hunda gæti nýst nemendum í lestri. Þennan valkost er því vert að hafa í huga þegar verið er að leita leiða til að efla lestur nemenda. Hins vegar er enn margt sem þarf að bæta og vinna að til að verkefni sem þetta geti náð fótfestu hér á landi