Ímynd stjórnmálaflokka

Meginmarkmið þessarar ritgerðar er að varpa ljósi á ímyndarlega stöðu þeirra stjórnmálaflokka sem sæti eiga á Alþingi í byrjun árs 2019. Þeir stjórnmálaflokkar sem rannsakaðir verða eru þeir flokkar sem fengu sæti á Alþingi í kosningunum 2017 ásamt því að halda sæti á Alþingi samkvæmt síðustu þrem könnunum Gallup (e.d.) árið 2018: Flokkur fólksins, Framsóknarflokkur, Miðflokkur, Píratar, Samfylkingin, Sjálfstæðisflokkurinn, Viðreisn og Vinstri græn. Markmiði rannsóknarinnar verður svarað með fimm rannsóknarspurningar að leiðarljósi: ➢ Hver er ímyndarleg sérstaða stjórnmálaflokka sem sæti eiga á Alþingi í byrjun árs 2019? ➢ Endurspeglar ímyndarleg staða stjórnmálaflokkanna staðfærsluáform þeirra? ➢ Hefur ímyndarleg staða stjórnmálaflokkanna breyst á milli áranna 2013 og 2019? ➢ Speglar ímynd „klofningsflokks“ ímynd „móðurflokks“? ➢ Sækir „klofningsflokkur“ fylgi sitt fremur til „móðurflokks“ en til annarra flokka? Megindleg aðferðafræði var notuð við rannsóknina í formi spurningalista sem lagður var fyrir hentugleikaúrtak. Fjöldi marktækra svara voru 406 og var notast við tölfræðiforritið Statistical Package for the Social Sciences við úrvinnslu og greiningu á gögnum. Gerð voru vörukort með aðstoð Microsoft Excel sem innihéldu ellefu ímyndarþætti fyrir stjórnmálaflokkanna átta. Settar voru upp krosstöflur og kí-kvaðrat próf framkvæmd ásamt t-prófum. Helstu niðurstöður rannsóknarinnar leiddu í ljós að Píratar eru eini stjórnmálaflokkurinn sem mældist með ásættanlega stöðu samkvæmt vörukorti og eiga aðrir flokkar mislangt í land með að tryggja sér sterka, jákvæða og einstaka stöðu. Ímyndarleg staða stjórnmálaflokkanna endurspeglaði að litlu leiti staðfærsluáform allra flokkanna. Flokkur fólksins, Miðflokkur og Samfylkingin hafa ekki staðfærsluáform sem eru einnig í ímynd þátttakenda rannsóknarinnar. Fyrri mælingar á ímynd gefa til kynna að fáir flokkar hafi náð árangri milli ára varðandi ímyndarlega stöðu. Einnig voru „klofningsflokkar“ bornir saman við „móðurflokka“. „Klofningsflokkunum“ Miðflokki og Viðreisn hefur tekist að aðgreina sína ímynd að mörgu leyti frá „móðurflokkunum“ Framsókn og Sjálfstæðisflokk. Fylgi „klofningsflokkanna“ var skoðað og niðurstöður krosstöflu leiddu í ljós að Miðflokkur og Viðreisn sækja ekki fylgi sitt til Framsóknarflokksins og Sjálfstæðisflokksins. Ályktanir sem hægt er að draga af niðurstöðum rannsóknarinnar eru þær að ímyndarleg staða stjórnmálaflokkanna í huga kjósenda er sjaldan sterk, jákvæð og einstök. Forsvarsmenn flokkanna verða að stunda markvissar og reglulegar rannsóknir til þess að bæta ímyndina og fylgjast grannt með breytingum á henni. Ímyndarrannsóknir sem þessar geta stjórnmálaflokkar notað til þess að fylgjast með breytingum á markaði, kortleggja styrkleika og veikleika miðað við aðra og séð hvort aðgerðir flokksins skili jákvæðum eða neikvæðum breytingum á ímynd