Orkuferðamenn í Kröflustöð

Jarðvarmi er það fyrirbrigði í náttúrunni sem hefur hvað mest aðdráttarafl í ferðaþjónustu á Íslandi. Fjöldi erlendra gesta fer í Bláa Lónið eða Jarðböðin í Mývatnssveit í heimsókn sinni til landsins. Stórbrotin náttúra landsins, jarðfræðileg sérstaða þess og nýting jarðhitans eru seglar sem hafa gert Ísland að spennandi áfangastað. Á Kröflusvæðinu er jarðsagan beinlínis í mótun og fjöldi manns kemur á svæðið á hverju sumri til að skoða ummerki Kröfluelda. Áhyggjur almennings af loftlagsbreytingum og vaxandi áhugi á umhverfismálum vekja upp spurningar um endurnýjanlega orku. Í Kröflustöð er gestastofa þar sem ferðamenn geta fræðst um sögu svæðisins, vinnsluferlið í jarðvarmavirkjuninni og fengið almennar ferðaupplýsingar. Rannsóknarverkefni þetta byggir á könnun meðal erlendra ferðamanna í gestastofunni með það að markmiði að draga upp mynd af dæmigerðum ferðamanni sem þangað kemur. Einnig var stuðst við dagbók og óformleg samtöl við gesti. Niðurstöður sýna að ferðaþjónusta og orkuframleiðsla geta vel farið saman. Heimsóknum í gestastofur orkuframleiðslufyrirtækjanna fer fjölgandi og því mikilvægt að huga að þróun þeirra. Ferðamenn í Kröflustöð koma flestir vegna áhuga á endurnýjanlegri orku eða eftir að hafa fengið áhuga á virkjuninni þegar þeir skoðuðu sig um á svæðinu. Lykilorð: Jarðvarmi, Kröfluvirkjun, gestastofa, orkuferðamenn