Upplifun framlínustarfsmanna fjarskiptafyrirtækis á innri markaðssetningu

Tilgangur innri markaðssetningar er að skapa andrúmsloft sem tryggir að væntingum og kröfum starfsmanna sé mætt. Með fullnægjandi starfsumhverfi getur fyrirtæki laðað að sér, þróað, hvatt og viðhaldið skilvirkum starfsmönnum og náð fram því besta hjá þeim. Áhrifin er hægt að sjá í jákvæðu viðhorfi starfsmanna til starfs síns, sem í framhaldi getur leitt af sér skuldbindingu gagnvart fyrirtækinu. Rannsóknin hefur það að markmiði að skoða hvernig framlínustarfsmenn hjá íslensku fjarskiptafyrirtæki upplifa innri markaðssetningu og hvort eða hvernig viðmælendur séu á þeirri vegferð sem leiðir til skuldbindingar. Til að öðlast dýpri skilning á innri markaðssetningunni voru tekin djúpviðtöl við fimm starfsmenn í deild sem sér um tæknilega aðstoð. Þeir hafa allir það sameiginlegt að starfa í framlínunni og í beinum samskiptum við viðskiptavini. Viðtölin voru greind og túlkuð samkvæmt fyrirbærafræðilegri aðferð og spruttu eftirfarandi þemu upp úr rannsókninni: 1) Undirbúningur og þjónustuáherslur 2) Menning og starfsandi 3) Starfið 4) Aðstaða og ánægja 5) Framtíðin. Helstu niðurstöður sýna jákvæð viðbrögð framlínustarfsmanna gagnvart innri markaðssetningu og að fyrirtækinu hafi tekist að beina starfsmönnum sínum í átt til skuldbindingar. Starfsþjálfun, starfsandi, starfsánægja og samband við yfirmenn voru allt þættir sem komu vel út og sáu allir fimm viðmælendur fram á að vinna hjá fyrirtækinu næstu tvö árin og fjórir þeirra gott betur en það